Mae cydsynio yn digwydd pan fydd y sawl sy'n ymgymryd ag unrhyw fath o weithgaredd rhywiol yn cytuno i gymryd rhan o’u gwirfodd. Mae angen iddynt hefyd feddu ar y rhyddid a'r gallu i wneud y dewis hwnnw. Dysgwch fwy am yr hyn y mae ‘rhyddid’ a ‘gallu’ yn golygu yng nghyd-destun cydsynio.

Nid oes gan rywun y rhyddid na'r gallu i gytuno i weithgaredd rhywiol o’u gwirfodd os: 

• Maent yn cysgu neu'n anymwybodol
• Ydynt wedi yfed gormod neu wedi cymryd gormod o gyffuriau, neu wedi cael eu ‘sbeicio’
• Ydynt o dan bwysau, yn cael eu cam-drin, yn cael eu twyllo neu eu hofni i ddweud 'ie'
• Ydy’r person arall yn defnyddio grym corfforol yn ei erbyn

Cofiwch, fodd bynnag, mai ambell enghraifft o ddiffyg cydsynio yn unig geir uchod. 

Ffordd arall o feddwl am gydsynio yw rhywun yn dweud ‘ie’ dim ond pan fyddant yn WIRIONEDDOL golygu ‘Ie’, nid oherwydd eu bod yn teimlo rheidrwydd i wneud neu nad ydynt yn deall yr hyn y maent yn cytuno i’w wneud. Gelwir hyn yn ‘gydsyniad brwdfrydig’. Trwy gyfathrebu â'ch partner, trafod yr hyn yr hoffech eich dau ei wneud, gallwch sicrhau cydsynio.

Os nad ydych yn deal cydsynio, neu’r hyn a ystyrir yn anghydsyniol, gwyliwch Heddlu Thames Valley yn esbonio cydsynio yn y fideo byr hwn.

Cyfathrebu Cydsyniad

Nid oes rhaid i gydsynio amharu ar ryw. Mae’n golygu talu sylw i weithredoedd, geiriau a synau eich partner bob tro y byddwch yn cael rhyw a thrwy gydol pob cyfathrach rywiol.

Yn ôl Brook, dylech gymryd eiliad i:

• Ofyn i'ch partner os mai gweithgaredd rhywiol yw'r hyn y maent ei eisiau ac os yw'n teimlo'n dda.
• Wrando ar yr hyn y maent yn ei ddweud.
• Ddarllen iaith corff eich partner.

Rhoi cydsyniad

Mae mabwysiadu cydsynio da yn golygu ystyried eich teimladau, emosiynau a'ch corff eich hun.

• Meddwl: beth ydw i'n ei feddwl?
• Emosiynol: sut ydw i'n teimlo?
• Corfforol: sut mae fy nghorff yn ymateb?

Cofiwch:

Er bod ein cyrff yn rhoi arwyddion i ni, mae angen i ni ystyried ein meddyliau a'n hemosiynau hefyd. Nid yw'r ffaith bod eich corff yn ymateb mewn ffordd benodol yn golygu bod yn rhaid i chi gael rhyw os nad ydych chi eisiau.

Tynnu cydsyniad yn ôl 

Mae gennych yr hawl i dynnu cydsyniad yn ôl unrhyw bryd a, phan fyddwch yn gwneud hynny, dylai eich partner(iaid) barchu eich dymuniadau ar unwaith a hynny heb eich cwestiynu. Nid yw’r ffaith eich bod wedi cydsynio i un peth yn golygu eich bod wedi cydsynio i rywbeth arall, ac mae’n hollol iawn dweud ‘na’ neu stopio ar unrhyw adeg os nad ydych am barhau. 

Nid oes rhaid i chi esbonio i’ch partner(iaid) pam eich bod wedi tynnu cydsyniad yn ôl os nad ydych yn dymuno gwneud hynny. A gallwch roi cydsyniad eto os bydd eich teimladau'n newid a'ch bod am barhau.